Rosario Álvarez Blanco

Catedrática da área Filoloxías Galega e Portuguesa. Docente na Facultade de Filoloxía e investigadora do ILG. Membro do grupo FILGA. Formada na USC: licenciatura e grao en Filoloxía Románica (1974), doutoramento en Filosofía e Letras (Románicas) coa tese O pronome persoal galego (1980).

Actividade investigadora centrada na variación e cambio lingüístico do galego, sobre todo en perspectiva diatópica; na gramática comparada portugués-galego (PE e PB); e na edición e estudo de textos do “galego medio” (séculos XVI-XVIII), sempre á procura do mellor coñecemento do galego contemporáneo, coa evolución diacrónica e diatópica que conduciu ata el.

Membro do equipo do Atlas Lingüístico Galego desde os inicios. Coautora de dúas gramáticas do galego, con Monteagudo/Regueira (1986) e Xove (2002); IP do equipo redactor da gramática da RAG. Directora do Tesouro do léxico patrimonial galego e portugués, no que colaboran equipos de Galicia, Portugal e Brasil. Codirectora do proxecto Gondomar. Corpus dixital de textos galegos da Idade Moderna.

Foi Vicerreitora de Profesorado (1990-94), Directora do Departamento de Filoloxía Galega (1995-99), do Instituto da Lingua Galega (2005-13) e da revista Estudos de Lingüística Galega (2009-2018); Vicepresidenta do Consello da Cultura Galega (2010-2018); membro da Comisión Executiva da RAG, como Tesoureira (2013-2017).

Académica numeraria da Real Academia Galega (desde 2003); coordina o Seminario de Gramática e dirixe a sección de Lingua. Presidenta do Consello da Cultura Galega (desde 2018).