Andrea Santiso Arias

Andrea Santiso Arias (Antas de Ulla, 1998) é graduada en Lingua e Literatura Galegas pola Universidade de Santiago de Compostela (2017-2021). Realizou o seu Traballo de Fin de Grao sobre a toponimia maior do concello de Antas de Ulla, titorizado por Ana Boullón. Despois dun proceso de adaptación, a Toponimia de Antas de Ulla publicouse como volume da colección Terra Nomeada da Asociación Galega de Onomástica e da Real Academia Galega. Posteriormente, estudou o mestrado en Profesorado de Educación Secundaria Obrigatoria e Bacharelato, Formación Profesional e Ensino de Linguas na mesma universidade (2021-2022). O seu Traballo de Fin de Mestrado xira tamén arredor da onomástica, A potencialidade da toponimia na aula: unha proposta de intervención educativa, titorizado por Carme Hermida Guliás. Ambos os dous traballos, o TFG e mais o TFM, foron galardoados co Premio á calidade lingüística en galego.

A través do Instituto da Lingua Galega participa no proxecto Toponomasticon Hispaniae, cuxo obxectivo é o estudo e divulgación dun corpus seleccionado de nomes de lugar de todo o territorio español e portugués e, asemade, o establecemento de bases metodolóxicas firmes para o estudo da toponimia. Forma parte do equipo directivo da Asociación Galega de Onomástica (Santiago de Compostela) e é membro do Instituto de Estudos Ulloáns, onde coordina a sección de Filoloxía, Literatura e Toponimia. Na actualidade exerce como docente de Lingua Galega e Literatura no IES Lama das Quendas, en Chantada (Lugo).