María Álvarez de la Granja

Son Profesora Titular do Departamento de Filoloxía Galega da Universidade de Santiago de Compostela. Licencieime en Filoloxía Galega con grao en 1994 e obtiven o título de doutora en 2002. Desde ese momento formo parte do ILG, como membro do seu Consello Científico. Actualmente, son a secretaria do centro.

A miña investigación oriéntase principalmente cara ao léxico, a lexicografía, a semántica e a fraseoloxía. En relación con este último campo, cómpre mencionar a miña publicación As locucións verbais galegas (2003). Con respecto ao eido lexicográfico, participei no proxecto que conduciu á elaboración do Dicionario de dicionarios do galego medieval (2006), dirixido por Ernesto González Seoane e do que son coautora. Así mesmo, formo parte do equipo que traballa no Tesouro do léxico patrimonial galego e portugués e en 2014 publiquei, en coautoría con Belén López Meirama, o Léxico dispoñible do galego. Actualmente traballo na elaboración dun corpus de textos galegos escritos por estudantes, con anotación informatizada das formas non estándares.