Os textos son retallos de memoria escrita que van deixando os tempos no seu ronsel. Conservalos é de seu outro episodio de memoria e editalos filoloxicamente representa unha tripla responsabilidade: co propio texto, coas necesidades dos lectores actuais e cos horizontes que abren na actualidade as novas tecnoloxías da información. Na procura do equilibrio entre estes tres factores acoden ao convite do ILG os seis participantes na sección de Edición de textos. Presentan propostas representativas de enfoques diversos, froito dunha longa experiencia editora de textos medievais e modernos. As súas achegas contribuirán a ofrecerlles aos asistentes unha rica panorámica das tendencias actuais e a dar novo alento metodolóxico e técnico aos que nos próximos anos se ocupen de rescatar o noso patrimonio textual antigo con novas edicións.
As palabras son os tixolos cos que se edifican os textos e cada unha delas é o resultado socializado da aprehensión dalgún elemento do mundo mediante formalización semiótica. Mentres permanecen vivas están sometidas a complicados e sutís equilibrios paradigmáticos impostos pola estrutura xeral do léxico e teñen fortes condicionamentos de nivel no seu uso. Neste simposio enfócanse desde a perspectiva diatópica e priorizando a súa dimensión patrimonial, pero ao mesmo tempo quérese mostrar como o inventario de formas atesourado con métodos tradicionais pode ser sistematizado e ofrecido ao mundo en soportes modernos e con aplicacións innovadoras. Por iso consideramos conveniente convidar á sección de Córpora de léxico dialectal a especialistas que traballan nesta mesma dirección e con proxectos interesantes noutros dominios lingüísticos que nos son próximos. A súa comparecencia conxunta cos especialistas de Galicia serve tamén ao propósito de dar continuidade a relacións científicas con grupos e centros de investigación relevantes neste campo, que son sempre enriquecedoras e contribúen á circulación fluída e a difusión dos logros que vaian aparecendo como consecuencia da maduración no proceso de investigación do léxico patrimonial.
As voces son o son que nos trae as vivencias, as experiencias e o modo de estar no mundo das xentes do noso país. En grande medida a Galicia tradicional e as súas raíces chegaron a nós apoiadas exclusivamente na voz transmitida secularmente de pais a fillos, en relatos que se foron perdendo, pero por fortuna a nosa xeración dispuxo de medios técnicos para os reter. As voces de moitos galegos perderíanse para sempre no vento que as leva se non fose polo traballo que o ILG vén desenvolvendo dende hai décadas, tanto a través da recolleita feita para o ALGa como, posteriormente, e de maneira máis sistemática, se vén facendo no AGO. Esta constante preocupación pola conservación do material sonoro permítenos hoxe contar cun importante patrimonio que cómpre arrequentar con novas achegas e ao que cómpre tamén tirarlle o máximo partido para que contribúa ao coñecemento do que somos e do que falamos. As contribucións que se presentan na sección de Córpora Oral pretende botar unha ollada sobre a importante contribución feita ata o momento, pero tamén sobre as relevantes achegas que podemos facer no futuro e para iso contamos coa participación de investigadores que en dúas linguas próximas a nós, catalán e portugués, se veñen facendo ao longo dos últimos anos.
Confiamos en que este Simposio do ILG 2011 sirva de complemento e reforzo para a formación dos estudantes, especialmente de segundo e terceiro ciclos, e, sobre todo, de estímulo para que os investigadores novos tomen contacto con especialistas e con ideas que lles descubran as posibilidades destes suxestivos e prometedores campos de estudo.
