IV Simposio Internacional Aspectos Lingüísticos do Noroeste Ibérico

Prácenos anunciar o IV Simposio Internacional Aspectos Lingüísticos do Noroeste Ibérico (SIALNI4), que se celebrará os días 3 e 4 de outubro de 2024 na Facultade de Filoloxía da Universidade de Santiago de Compostela. Este simposio quere seguir o espírito das tres anteriores edicións, que tiveron lugar nas Universidades de Xénova (2021), Oviedo (2022) e Salamanca (2023), e aspira a converterse nun lugar de encontro de referencia para os académicos que se dedican á investigación da realidade lingüística do noroeste ibérico.

Premio á mellor comunicación para investigadores noveis

Co fin de promover a participación de investigadores mozos que traballen en aspectos lingüísticos do noroccidente ibérico e seguindo o exemplo da anterior edición, o comité organizador convoca o II Premio á mellor comunicación de investigadores noveis. Poderán optar ó premio aqueles comunicantes que na data de finalización do simposio (4 de outubro de 2024) cumpran cos seguintes requisitos:

• Non ter o título de doutor nin estar en condicións para obtelo.
• Estar cursando estudos de grao, mestrado ou doutoramento no sistema universitario español ou no estranxeiro.
• Expresar o seu desexo de concorrer ó premio, enchendo o formulario establecido antes do 15 de setembro de 2024. Ademais, as persoas que participen deberán anexar unha proba da súa condición de estudantes (resgardo da matrícula ou outro documento acreditativo semellante).

O xurado que decidirá o gañador estará integrado por cinco membros seleccionados do comité organizador e do comité científico, que comunicarán o nome da persoa gañadora na sesión de clausura do simposio. O premio consistirá nun diploma acreditativo e no reembolso da cota de inscrición.