As persoas e os grupos humanos cambian e evolucionan, e as linguas vanse adaptando en cada momento ás necesidades dos individuos e das sociedades. Esa evolución é obxecto da investigación lingüística, que pretende identificar e explicar non só os cambios que se produciron no pasado, e dos que hoxe vemos os resultados, senón tamén os posibles cambios que se van producir no futuro e que podemos ver en proceso de desenvolvemento na lingua actual.
O simposio que presentamos este ano pretende afondar no estudo do cambio lingüístico e prestar especial atención aos factores que están detrás dos procesos que actualmente teñen lugar. As fondas mudanzas da sociedade e da cultura que se produciron no último século sen dúbida teñen o seu reflexo na lingua. Entre os factores que interveñen nas mudanzas lingüísticas producidas nos últimos decenios ou en desenvolvemento na actualidade está o contacto co español, que xa é secular en Galicia, mais que nos últimos tempos alcanzou un impacto especialmente relevante. Determinar as repercusións destas mudanzas e do contacto lingüístico é un dos principais obxectivos deste simposio, mais tamén se tratarán outros aspectos de variación e mudanza lingüística que se están a percibir na sociedade actual.
Cabo de investigadores de recoñecido prestixio internacional, que nos fornecerán diferentes abordaxes metodolóxicas, participarán un bo número de investigadoras novas que presentarán as liñas de investigación nas que están traballando e que xa están a producir importantes resultados. Neste respecto, terán especial protagonismo enfoques innovadores e aspectos pouco tratados ata o momento neste tipo de estudos, como o estudo da lingua dos neofalantes, a creación de identidades no discurso, a escrita electrónica, aspectos de prosodia, de dialectoloxía perceptiva, de fonoloxía experimental, entre outros, cabo de traballos que abordan vellos problemas mais desde perspectivas diferentes, como a utilización dos recursos da xeolingüística e da toponimia ou a utilización de técnicas experimentais e estudos perceptivos. Desta maneira o programa do simposio quere mostrar a vitalidade que están alcanzando este tipo de traballos na lingüística galega actual e amosar algunhas das posibilidades da aplicación de novos enfoques para comprendermos mellor como cambiou e como está a mudar a lingua nos nosos días.
