Manuel González González

Catedrático de Filoloxía Románica da Universidade de Santiago, onde levou a cabo unha parte importante da súa formación, e onde foi con anterioridade profesor axudante, profesor adxunto e profesor titular. A vinculación á USC non se interrompeu nin sequera nos anos que exerceu como agregado e catedrático de Lingua e Literatura españolas de ensino medio.  Investigador do Instituto da Lingua Galega, director dos cursos de lingua e cultura galegas para estranxeiros durante 21 anos, e membro do grupo de investigación FILGA.

A súa actividade investigadora céntrase nos ámbitos da xeografía lingüística (coautor do Atlas Lingüístico Galego, e membro do equipo do Atlas Linguistique Roman e do Atlas Linguarum Europae), da lexicografía (dirixe o Dicionario da RAG; codirixiu o Diccionario castelán-galego da RAG e o Volga; dirixiu o equipo do Diccionario de verbos Laverca, a primeira obra lexicográfica que incorpora voz sintetizada); da terminoloxía (coautor de diversos dicionarios e vocabularios de especialidade); da sociolingüística (presidiu a Comisión técnica do Plan Xeral de Normalización Lingüística de Galicia, e dirixiu desde o 1994 a elaboración do Mapa sociolingüístico de Galicia e a súa actualización do 2004), da norma (participou na elaboración das Bases prá unificación lingüística do galego, e nas Normas RAG-ILG); da fonética e tecnoloxías da fala (estudos de fonética acústica, e codirixiu a elaboración de Cotovía e outros proxectos de síntese e recoñecemento de voz).

Membro numerario da Real Academia Galega desde febreiro de 1992, foi secretario e tesoureiro desta institución, na que dirixiu o Seminario de sociolingüística, e onde actualmente coordina os Seminarios de lexicografía e de terminoloxía e se encarga da dirección do DRAG. Coordinador científico do Centro Ramón Piñeiro para a investigación en humanidades desde 2002. Director de TERMIGAL desde 1996. Presidente de Puntogal. Membro correspondente do Institut d’Estudis Catalans.

Director de Cadernos de lingua, e membro do Consello científico dunha vintena de revistas lingüísticas de diversos países dos ámbitos da súa investigación.