Ana Isabel Boullón Agrelo

Profesora titular do Departamento de Filoloxía Galega da Universidade de Santiago de Compostela. Licenciada en Filoloxía Galego-Portuguesa en 1985, grao de licenciatura en 1986 e de doutoramento en 1994, coa tese titulada Contribución ó estudio da antroponimia medieval galega (séculos VIII-XIII).

A súa actividade investigadora está centrada na onomástica, na edición de textos, especialmente medievais, e na lexicografía histórica. Vinculada ó Instituto da Lingua Galega (USC) desde 1985, forma parte do seu comité científico, e é responsable da súa Sección de Onomástica, onde se realizou a web Cartografía dos Apelidos de Galicia, en colaboración con Xulio Sousa. Participou na elaboración do Dicionario de dicionarios do galego medieval. Actualmente coordina o proxecto Toponomasticon Hispaniae, no cal interveñen equipos de toda a península ibérica, a Guía de nomes galegos da Real Academia Galega e o Dicionario de apelidos galegos, de próxima aparición.

Forma parte do equipo directivo da Asociación Galega de Onomástica (Santiago de Compostela), é membro de número da Real Academia Galega e doutras asociacións científicas, e participa en revistas académicas no consello de redacción, científico ou asesor ou como correspondente: Viceversa, Estudos de Lingüística Galega, Rivista Italiana di Onomastica (Roma), Onomàstica. Anuari de la Societat d'Onomàstica (Barcelona), LaborHistórico (Rio de Janeiro) e Cadernos de Lingua (Real Academia Galega).